ელექტრონული ბიბლიოთეკა საქართველოს გარემოს დაცვისა და სოფლის მეურნეობის სამინისტრო

დარგი/დარგები: სურსათი;

აღწერა: კვება ადამიანის ძირითადი ბიოლოგიური, სასიცოცხლო პროცესია. სრულფასოვანი კვება, რაციონში ისეთი ცხოველური და მცენარეული წარმოშობის პროდუქტების ჩართვაა, რომლებიც უზრუნველყოფს ორგანიზმს საჭირო რაოდენობის ცილებით, ცხიმებით, ნახშირწყლებით, ვიტამინებითა და მიკროელემენტებით. არასრულფასოვანი სურსათის მოხმარება იწვევს ორგანიზმის თანდათანობით დასუსტებასა და სხვადასხვა დაავადების განვითარების რისკის ზრდას. ადამიანის მოხმარებისათვის განკუთვნილი სურსათი შეიძლება იყოს როგორც ცხოველური წარმოშობის - სხვადასხვა ცხოველის, მათ შორის, ფრინველის ხორცი, თევზი, კვერცხი, რძე და რძის ნაწარმი და მათგან დამზადებული პროდუქტები, ისე მცენარეული წარმოშობის - ხილი, ბოსტნეული, სოკო, კენკროვანები, მარცვლოვნები და პარკოსნები. სწორად შერჩეული სურსათი არა მარტო აკმაყოფილებს ადამიანის სიცოცხლისათვის აუცილებელ ფიზიოლოგიურ მოთხოვნებს, არამედ ფართოდ გამოიყენება სხვადასხვა დაავადების თავიდან აცილებისა და პროფილაქტიკისათვის. თუმცა, ზოგ შემთხვევაში, სურსათის მოხმარებამ, თუკი ის მავნეა, შესაძლებელია საფრთხე შეუქმნას ადამიანს. სურსათი მავნედ მიიჩნევა, თუ იგი საფრთხეს უქმნის ჯანმრთელობას ან/და სიცოცხლეს და არ არის მიზანშეწონილი ადამიანის მიერ მისი მოხმარება. ჯანმრთელობისთვის მავნე სურსათის პრობლემა კაცობრიობას დასაბამიდანვე აწუხებდა და დღესაც არ კარგავს აქტუალობას. ბოლო რამდენიმე ათწლეულია მსოფლიოში სერიოზული ყურადღება ეთმობა სურსათის უვნებლობის საკითხს. საერთაშორისო ვაჭრობის განვითარებამ, ახალმა ტექნოლოგიებმა და გარემოში მიმდინარე პროცესებმა ხელი შეუწყო ახალი საფრთხეების წარმოშობასა და სურსათით გამოწვეული დაავადებების ზრდას. 2014 წელს, საქართველო-ევროკავშირის ასოცირების შეთანხმების ხელმოწერის შემდეგ, გააქტიურდა სურსათის უვნებლობის სახელმწიფო რეგულირების თანამედროვე სისტემის შექმნის პროცესი. დამტკიცდა 2015-2027 წლების საკანონმდებლო დაახლოების გეგმა სურსათის უვნებლობის, ვეტერინარიისა და მცენარეთა დაცვის სფეროში. საქართველოს ევროკავშირთან დაახლოების პროცესი ამ მიმართულებით აქტიურად მიმდინარეობს. სურსათის უვნებლობა მრავალსექტორული და მულტიდისციპლინური დარგია და საერთო პასუხისმგებლობაა მთავრობებს, მწარმოებლებს, სხვადასხვა მეცნიერების წარმომადგენლებსა და მომხმარებლებს შორის. ყველას აქვს თავისი როლი.